Më 21 nëntor, zemra e Bujanocit rrahu më fort se zakonisht. Sheshi kryesor u shndërrua në një hapësirë të gjallë, plot aromë, ngjyra dhe emocion, ku u sollën para publikut thesaret më të çmuara të trashëgimisë sonë kulturore e identitare. Manifestimi me gatime dhe veshje tradicionale shqiptare u kthye në një festë të madhe të bashkimit, ku secili ndjehej pjesë e një familjeje të përbashkët – asaj shqiptare.
Aroma e gatimeve të përgatitura me dashuri nga duart e grave të palodhura përshkoi të gjithë sheshin, duke rikthyer kujtime të fëmijërisë, traditave të vjetra dhe sofrës së bashkimit familjar. Krahas tyre, fëmijët e gëzuar, të veshur me elemente kombëtare, vallëzuan nën ritmet e këngëve shqipe, duke i dhënë ngjarjes energjinë dhe gjallërinë që vetëm fëmijëria di ta sjellë.
Plisat e bardhë, veshjet tradicionale, lojërat popullore dhe vizatimet me motive kombëtare krijuan një atmosferë shumëngjyrëshe, ku identiteti ynë kulturor u paraqit me krenari dhe elegancë. Ishte një ditë plot dritë, ngrohtësi dhe dashuri për atdheun – një ditë ku NëntorLugina arriti ta bashkojë komunitetin rreth një ideje të vetme: ruajtjes, kultivimit dhe promovimit të vlerave tona kombëtare.
Mirënjohje e veçantë i shkon Ministrisë së Turizmit, Kulturës dhe Sportit të Shqipërisë për mbështetjen e vazhdueshme dhe konkrete. Falënderim i veçantë edhe për Ambasadën e Shqipërisë në Beograd, e cila qëndroi pranë organizatorëve në çdo hap, duke e bërë këtë manifestim edhe më të suksesshëm.
Kontribut të jashtëzakonshëm dhanë edhe ShKA “Zëri i Luginës” dhe The Future, të cilët me profesionalizëm e përkushtim organizuan programin artistik dhe traditën që u shpalos para qytetarëve. Falënderim për Shtëpinë e Kulturës, për bashkëpunimin e ngrohtë e korrekt, si dhe për piktoren Leoneta Abdyli, e cila u kujdes që fëmijët të shprehnin talentin e tyre përmes artit. Një mirënjohje e veçantë shkon për gazetaren Lumturije Ahmeti për moderimin dinjitoz dhe frymëzues.
Në fund, një faleminderim të thellë për Bujanocin, i cili në këtë ditë frymoi vetëm shqip. Faleminderit të gjithë pjesëmarrësve që e bëri këtë ngjarje kaq të bukur, të ngrohtë dhe të paharrueshme. Kjo ditë dëshmoi edhe një herë se tradita jonë është e gjallë, e fortë dhe gjithmonë gati për t’u përcjellë me krenari te brezat që vijnë./Perspektiva/
