Më 20 nëntor, Shkolla Fillore “Naim Frashëri” në Bujanoc u mbush me gëzim dhe emocion për të shënuar Ditën e Alfabetit Shqiptar, një ngjarje që rikthen në kujtesë rëndësinë e Kongresit të Manastirit dhe unitetin tonë për një alfabet të përbashkët.
Nxënësit e shkollës përgatitën një program festiv të pasur dhe të larmishëm, ku përfshiheshin këngë, poezi, drama dhe monologë të frymëzuar nga kultura dhe historia shqiptare. Çdo interpretim ishte një mesazh i gjallë i dashurisë për gjuhën, shkronjat dhe identitetin tonë kombëtar.
Në këtë ditë të veçantë na nderoi me praninë e tij kryetari i Këshillit Kombëtar Shqiptar, z. Enkel Rexhepi, i cili së bashku me bashkëpunëtorët e tij shprehu mbështetjen e vazhdueshme për nismat kulturore dhe edukative të komunitetit shqiptar në Luginë.
Organizimi i këtij programi nuk do të ishte i mundur pa përkrahjen e Këshillit Kombëtar Shqiptar, të cilët gjithmonë mbeten partnerë të sigurt për ruajtjen dhe promovimin e identitetit kulturor dhe gjuhësor.
Faleminderit nxënësve, mësuesve dhe të gjithë pjesëmarrësve që kontribuan për të krijuar një atmosferë të veçantë dhe emocionuese. Kjo ditë është jo vetëm një festë e alfabetit, por edhe një festë e kulturës, dijes dhe bashkimit tonë kombëtar.
Gëzuar Ditën e Alfabetit Shqiptar!/Perspektiva/
