Më 24 nëntor, në Preshevë u zhvillua një takim i rëndësishëm bashkëpunimi, ku Shoqata “Vizioni për Zhvillim dhe Kooperim” (VZHK) mirëpriti organizatën e saj të re partnere, Fondacionin “Edirne Mimar Sinan Vakfı” nga Turqia. Vizita u mbajt në ambientet e VZHK-së dhe shënoi një hap të ri drejt zgjerimit të bashkëpunimeve ndërkombëtare që synojnë mbështetjen e zhvillimit në Luginën e Preshevës.
Gjatë takimit, përfaqësuesit e VZHK-së prezantuan historikun e shoqatës, misionin, objektivat dhe rezultatet e arritura ndër vite përmes projekteve në fushat e arsimit, zhvillimit ekonomik, mbështetjes sociale dhe aktiviteteve rinore. Kryetari i Fondacionit “Edirne Mimar Sinan Vakfı”, z. Hasan Gümüş, së bashku me stafin e tij, u njohën nga afër me punën e vazhdueshme të VZHK-së, e cila prej vitesh kontribuon në krijimin e mundësive të reja për komunitetin lokal.
Në kuadër të diskutimeve u trajtuan edhe nevojat aktuale të qytetarëve të Luginës së Preshevës, sfidat socio-ekonomike me të cilat përballen, si dhe potencialet për realizimin e projekteve të përbashkëta që synojnë përmirësimin e cilësisë së arsimit dhe jetës sociale. Të dyja palët shprehën gatishmëri për të zhvilluar iniciativa të reja që përfshijnë aktivitetet edukative, ndihmën sociale dhe programe të zhvillimit të qëndrueshëm.
Përfaqësuesit e Fondacionit “Edirne Mimar Sinan Vakfı” theksuan interesimin për të krijuar ura të forta bashkëpunimi dhe për të mbështetur projekte që kanë impakt të drejtpërdrejtë në komunitet. Takimi u vlerësua si tejet pozitiv dhe frytdhënës, duke hapur rrugën drejt partneriteteve të reja në fusha me rëndësi të madhe për qytetarët e Preshevës.
VZHK mbetet e përkushtuar në misionin e saj për të forcuar bashkëpunimin me organizata dhe institucione që ndajnë të njëjtat vlera dhe synime, duke vazhduar kështu angazhimin për zhvillimin e qëndrueshëm dhe mirëqenien e komunitetit lokal. Shërbimi për Informim pranë VZHK-së/Perspektiva/
