Me 11 nëntor, në Gostivar u zhvillua me shumë sukses festivali kulturor “Goca e Tivarit”, një ngjarje që solli një përzierje të veçantë të artit, muzikës dhe traditës shqiptare, duke krijuar një atmosferë festive dhe magjepsëse për të gjithë të pranishmit.
Ky edicion i festivalit pati një pjesëmarrje të larmishme nga artistë dhe grupe kulturore nga treva të ndryshme, si dhe vet nikoqirët e qendrës kulturore të Gostivarit, të cilët prezantuan para publikut një mozaik të gjallë të trashëgimisë sonë shpirtërore.
Një vlerë e shtuar e këtij viti ishte prania e mysafirëve të veçantë nga Shtëpia e Kulturës së Bujanocit, përfshirë edhe drejtoreshën Albena Mustafa, të cilët u pritën me ngrohtësi nga organizatorët dhe publiku gostivaras.
Festivali “Goca e Tivarit” dëshmoi edhe një herë se arti dhe kultura shërbejnë si ura që bashkojnë njerëzit përtej kufijve, duke kultivuar respektin dhe dashurinë për traditën dhe vlerat e përbashkëta shqiptare./Perspektiva/
