Në kuadër të aktiviteteve të “Javës së Kulturës”, më 21 nëntor në Shkollën Fillore “Prof. Ibrahim Kelmendi” në Preshevë, u mbajt dita e dytë e programit festiv, e cila i kushtohej dy ngjarjeve kyçe të historisë sonë kombëtare: Kongresit të Alfabetit dhe Festës së Flamurit, 28 Nëntorit. Atmosfera festive dhe mbushur me emocione u realizua nga vetë nxënësit, të cilët përmes poezive, këngëve dhe pjesëve teatrale sollën para publikut një program artistik të larmishëm e të përgatitur me përkushtim.
Drejtori i shkollës, z. Bardhyl Bajrami, përshëndeti pjesëmarrësit, duke theksuar rëndësinë e kultivimit të kulturës, gjuhës dhe historisë në brezat e rinj.
Programi u hap nga moderatoret e reja, nxënëset Liana Sadiku dhe Erlisa Sadriu, të cilat prezantuan një historik të shkurtër për të rikujtuar rolin vendimtar të Kongresit të Manastirit dhe simbolikën e 28 Nëntorit — ditën e shpalljes së Pavarësisë.
Festiviteti nisi me interpretimin e këngës “Kënga e Alfabetit”, kënduar nga nxënësit e klasës së katërt nën përkujdesjen e mësueses Fetanete Ahmeti, ndërsa më pas u recitua poezia “Dita e Alfabetit”nga nxënësja e klasës së dytë Fatjona Azizi.
Recitimin e vazhdoi nxënësi Fillor Ismaili me poezinë “O trima luftëtarë”, ndërkohë që skena u gjallërua me pjesën teatrale të interpretuar nga Medina Kadriu dhe Dijar Hasani, nën udhëheqjen e mësueses Mirvete Kadriu.
Në nderim të 28 Nëntorit, në skenë u sollën poezi të shumta, të interpretuara nga:
- Ajan Hyseni (klasa IV) – “28 Nëntori”
- Lirak Ramadani – “E kujtoj mësuesin”
- Isara Rexhepi – “Bijt e humbur”
- Riga Misini – “Dëshmorët”
- Hana Mehmedi – “Robëria”
Emocionet u shtuan edhe me dy pjesë teatrale të kushtuara festës së Flamurit, të luajtura nga nxënëset Erlisa Sadriu, Ajana Ismaili, Esma Tahiri dhe Elvira Hajredini, nën përkujdesjen e profesoreshës Fatbardha Sadriu.
Programi u përmbyll me një pjesë tjetër teatrale të realizuar nga nxënëset e klasës së pestë: Era Mehmeti, Andora Ibrahimi, Anika Bilalli, Aleja Sabedini, Jara Mehmeti, Erona Sulejmani dhe Rajana Ramizi, nën përkujdesjen e nxënëses Aksa Sahiti.
Ky aktivitet tregoi edhe një herë se sa shumë talent e energji krijuese ka tek nxënësit, të cilët përmes artit dhe kulturës vazhdojnë të mbajnë gjallë historinë dhe identitetin kombëtar.
Java e Kulturës vijon me aktivitete të tjera përgjatë ditëve në vijim.
