Më 24 nëntor, Medvegja u mbush me ngjyrat, ritmet dhe emocionet e kulturës shqiptare. Me këngë shqipe, me veshjen e veçantë medvegjase dhe me krelanën tradicionale që prej shekujsh simbolizon identitetin e kësaj treve, u manifestua fuqishëm shpirti i trashëgimisë kulturore dhe shpirtërore të shqiptarëve të Luginës së Preshevës, me theks të veçantë të Medvegjës.
Atmosfera në sallën e Qendrës së Kulturës në Medvegjë ishte e mbushur me gjallëri: valltarë që lëviznin me elegancë, tinguj të qiftelisë që zgjonin emocionin e rrënjëve, këngë e melodi që e mbajtën publikun frymëmbajtur. Çdo hap, çdo refren dhe çdo element i veshjes tradicionale ishte një dëshmi e krenarisë së një populli që ruan me devotshmëri trashëgiminë e tij.
Këshilli Kombëtar Shqiptar, si institucion përfaqësues i shqiptarëve të Luginës, këtë ditë u ndje më i bashkuar dhe më krenar se kurrë me identitetin dhe vlerat tona kombëtare. Ky manifestim nuk ishte vetëm një aktivitet kulturor, por një rikujtim se kultura është forca jonë, lidhja me të kaluarën dhe besimi për të ardhmen.
Aktiviteti u organizua në kuadër të programit kulturor “Nëntor Luginë”, një nismë që synon të promovojë dhe mbrojë trashëgiminë shqiptare në të gjitha trevat tona. Programi u mbështet nga Ministria e Turizmit, Kulturës dhe Sportit të Republikës së Shqipërisë, nën monitorimin e Ambasadës së Republikës së Shqipërisë në Beograd, si dhe me përkrahjen e pandërprerë të Këshillit Kombëtar Shqiptar.
Kjo ditë në Medvegjë dëshmoi edhe një herë se, pavarësisht sfidave të kohës, kultura jonë mbetet një thesar i gjallë që na bashkon, na fuqizon dhe na bën krenarë me rrënjët tona shqiptare. Respekt për të gjithë ata që kontribuan në këtë aktivitet të paharrueshëm!/Perspektiva/
