Gjatë tri ditëve të fundit, Bujanoci u shndërrua në një vendtakim të gjallë emocionesh, krenarie dhe dashurie për vendlindjen, në kuadër të manifestimit tradicional “Ditët e Diasporës”. Atmosfera e ngrohtë dhe mikpritëse që mbizotëroi në qytet, solli një afërsi të veçantë mes banorëve vendas dhe bashkatdhetarëve që kishin ardhur nga anë të ndryshme të botës.
Kryetari i Komunës së Bujanocit, Arbër Pajaziti, në një postim publik, e përshkroi këtë manifestim si një përjetim të paharrueshëm, ku emocionet ishin të prekshme në çdo takim e përqafim me mërgimtarët. “Ishte një ndjenjë e veçantë të dëgjoheshin rrëfimet e tyre dhe të ndaheshin emocionet që i lidhin përjetësisht me vendlindjen,” u shpreh ai.
Manifestimi nisi me takime të frytshme me përfaqësues të shoqatave të mërgatës, të cilët, sipas kryetarit Pajaziti, po dëshmojnë një përkushtim gjithnjë në rritje për zhvillimin e vendit. “Ata janë ura lidhëse mes Bujanocit dhe botës,” theksoi ai.
Programi i pasur i aktiviteteve përfshinte gjithçka: nga ndeshja simbolike mes ekipit të Tërnocit dhe Diasporës, te ekspozitat e artistëve dhe bletarëve vendas, e deri te aktiviteti sportiv “Tur de Lugina” me biçikleta. Çdo detaj i këtij organizimi kishte për qëllim të përçonte mesazhe të fuqishme bashkimi, identiteti dhe dashurie për atdheun.
Në përmbyllje, kryetari Pajaziti falënderoi të gjithë ata që kontribuan në suksesin e këtij edicioni: qytetarët, të rinjtë, artistët, organizatorët dhe mbi të gjitha – mërgimtarët. Me një mesazh të ngrohtë, ai theksoi:“Bujanoci është dhe do të mbetet shtëpia juaj, gjithmonë!”/Perspektiva/
