Preshevë, 26 tetor 2025 – Në Preshevë u zhvillua Konferenca Shkencore e Shoqatës për Trashëgimi dhe Krijimtari Kulturore (SHTKK), e cila mblodhi 48 studiues nga trevat shqiptare dhe diaspora. Nga ta, 31 paraqitën punime shkencore nga fusha të ndryshme të historisë, kulturës, letërsisë dhe identitetit kombëtar, me pjesëmarrës nga Shqipëria, Kosova, Maqedonia e Veriut, Lugina e Preshevës, Zvicra, si dhe shkrimtari çam, Arben Kondi.
Konferenca u drejtua nga një bord shkencor me përbërje të shquar akademike: prof. dr. Drita Halimi-Statovci, prof. dr. Agron Xhagolli, akademik Adem Bunguri, prof. dr. Isak Shema, prof. dr. Izaim Murtezani, dr. sc. Shpëtim Memishi dhe Xhemaledin Salihu.
Punimet u zhvilluan në pesë seanca shkencore, ndërsa hapjen solemne e bëri dr. Shpëtim Memishi. Fjalën përshëndetëse e mbajti kryetari i SHTKK-së, Xhemaledin Salihu, i cili theksoi rëndësinë e kësaj ngjarjeje për afirmimin e trashëgimisë dhe vlerave shkencore shqiptare.
Në emër të institucioneve, ngjarjen e përshëndetën ambasadori i Shqipërisë në Serbi, dr. Bardhyl Canaj, ambasadori i Zyrës Ndërlidhëse të Republikës së Kosovës në Serbi, Jetish Jashari, kryetarja e Komunës së Preshevës, Ardita Sinani, kryetari i Këshillit Kombëtar Shqiptar, Enkel Rexhepi, si dhe akademik Adem Bunguri nga Akademia e Shkencave të Shqipërisë.
“Kjo Konferencë ka dëshmuar se Lugina e Preshevës mbetet vatër e gjallë e kulturës, dijes dhe kërkimit shkencor. Me pjesëmarrjen e studiuesve nga trojet shqiptare, ne i japim zë historisë, trashëgimisë dhe vlerave tona kombëtare”,
– ka theksuar Xhemaledin Salihu në njoftimin e tij në Facebook.
Në kuadër të ceremonisë, u ndanë Mirënjohje për Ministrinë e Kulturës, Rinisë dhe Sportit të Republikës së Kosovës për mbështetjen e Konferencës 2025, si dhe për Fondin Humanitar të GNTC Gorenje Prishtinë, drejtuar nga Fatmir Kadriu, për financimin e botimit të librit me punimet e Konferencës 2024.
Gjatë sesioneve, u prezantuan punime nga studiues të njohur si akademik Adem Bunguri, prof. assoc. dr. Muhamet Bela, Zana Hoxha, akademik Hamit Kaba, dr. Afërdita Abdullahi Dërmaku, prof. assoc. dr. Naim Berisha, prof. assoc. dr. Faton Krasniqi, prof. dr. Vilma Proko, prof. dr. Izaim Murtezani, dr. Rini Useini, Arben Kondi, dr. Minir Ademi, Xhemaledin Salihu e të tjerë.
Në përmbyllje të punimeve, prof. dr. Agron Xhagolli mbajti fjalën përmbyllëse, duke vlerësuar arritjet dhe duke propozuar ide për përmirësimin e edicionit të ardhshëm të vitit 2026.
“Kjo Konferencë është dëshmi se bashkëpunimi midis institucioneve shqiptare, brenda dhe jashtë kufijve, mund të sjellë rezultate të prekshme. Lugina e Preshevës është pjesë e pandarë e mozaikut kulturor dhe shkencor shqiptar,” – theksohet në përfundim të njoftimit të SHTKK-së.
Ngjarja u vlerësua si një ndër forumet më të rëndësishme shkencore të vitit në Luginën e Preshevës, duke krijuar një hapësirë të përbashkët për studiuesit dhe krijuesit shqiptarë nga të gjitha trevat./perspektiva/
