Më 24 nëntor, nën organizimin e Shtëpisë së Kulturës, në Bujanoc u mbajt sonte manifestimi tashmë tradicional “Duart e Vyeshme”, një ngjarje që çdo vit tubon njerëz të pasionuar pas trashëgimisë, artit dhe punës së dorës. Ky event, i cili është shndërruar në një pikëtakim të rëndësishëm kulturor për komunitetin, ka zgjuar interes të madh tek qytetarët e të gjitha moshave.
Atmosfera e mbrëmjes ishte e mbushur me gjallëri e ngrohtësi, ndërsa ekspozuesit prezantuan ushqime tradicionale, receta të trashëguara brez pas brezi, si dhe punime artizanale që dëshmojnë mjeshtërinë dhe kreativitetin e duarve të zonja të Bujanocit. Nga gatimet autoktone, tek punimet me tezgjah, qëndisjet, punimet me dru apo materiale të riciklueshme, çdo stendë sillte një histori, një kujtim, një copëz kulture që ruhet me përkushtim.
Manifestimi “Duart e Vyeshme” jo vetëm që promovon vlerat e kulturës sonë materiale, por edhe i jep hapësirë krijuesve vendorë për t’i prezantuar punët e tyre para publikut të gjerë. Ky aktivitet mbetet një shembull i rëndësishëm se si tradita, arti dhe bashkëpunimi komunitar mund të ndërtojnë ura të reja komunikimi dhe të rikthejnë vlerësimin për punën e dorës.
Ngjarja përfundoi në një atmosferë të ngrohtë, duke lënë prapa përshtypje pozitive dhe dëshirën që ky manifestim të vazhdojë të rritet e të zgjerohet edhe më shumë në vitet që vijnë, me qëllim ruajtjen dhe promovimin e trashëgimisë sonë kulturore./Perspektiva/
