Më 28 Nëntor, Dita e Flamurit dhe e Pavarësisë u shënua në Bujanoc me një program të pasur kulturor e diplomatik, të organizuar nga Ambasada e Republikës së Shqipërisë në bashkëpunim me Komunën e Bujanocit. Ceremonia festive nisi në Shtëpinë e Kulturës, ku u shfaq filmi i mirënjohur shqiptar “Përrallë nga e kaluara”, një vepër e çmuar e kinematografisë sonë kombëtare. Falënderim të posaçëm iu drejtua Arkivit Qendror Shtetëror të Filmit për mundësimin e kësaj vepre dhe bashkëpunimin e vazhdueshëm institucional.
Mbrëmja festive vijoi me një pritje solemne, të organizuar së bashku me Këshillin Kombëtar Shqiptar, në restorantin “Düsseldorf”, ku atmosfera u plotësua nga interpretimi elegant i pianistes së talentuar Arlinda Bici dhe ekspozita me fotografi nga Shqipëria e artistit të njohur Arian Mavriqi. Ky kombinim i artit, muzikës dhe frymës kombëtare i dha ngjarjes një dimension të veçantë kulturor.
Pritja u nderua nga pjesëmarrja e përfaqësuesve të rëndësishëm institucionalë dhe diplomatikë, përfshirë delegacionin e Ministrisë së Jashtme të Serbisë: Sekretaren e Shtetit Nevena Jovanoviq, Ndihmës Ministrin Zhelko Joviq dhe Shefin e Protokollit të Shtetit Branko Radovaniq. Po ashtu të pranishëm ishin Shefi i Zyrës së OSBE-së në Bujanoc, Antonios Balaskas; Shefi i Zyrës së Shtetit të Kosovës në Serbi, Ambasador Jetish Jashari; Kryetari i Këshillit Kombëtar Shqiptar, Enkel Rexhepi; kryetarët e komunave të Bujanocit dhe Preshevës, Arbër Pajaziti dhe Ardita Sinani; deputeti shqiptar në Parlamentin e Serbisë, Shaip Kamberi; si dhe përfaqësues të trupit diplomatik, të partive politike shqiptare, të shoqërisë civile, biznesit, mediave dhe komunitetit kulturor të Luginës së Preshevës.
Në fjalën e tij përshëndetëse, Ambasadori Bardhyl Canaj theksoi se është nder dhe privilegj që Përfaqësia Diplomatike e Shqipërisë të organizojë sërish aktivitetet e 28 Nëntorit në Luginën e Preshevës. Ai nënvizoi se Ambasada e Shqipërisë mbetet e përkushtuar ndaj forcimit të bashkëpunimit me të gjithë aktorët politikë, shoqërorë dhe ekonomikë të rajonit, duke synuar përmirësimin e kushteve të shqiptarëve në Serbi dhe rritjen e bashkëpunimit të ndërsjellë.
Ambasadori Canaj po ashtu vuri në dukje se marrëdhëniet dypalëshe mes Shqipërisë dhe Serbisë po përparojnë pozitivisht në një sërë fushash, duke krijuar hapësira të reja bashkëpunimi dhe mirëkuptimi. Ky progres, theksoi ai, është në dobi të qytetarëve të të dy vendeve dhe kontribuon në stabilitetin e rajonit, i cili po ecën drejt integrimit të plotë europian.
Në Bujanoc, festa e 28 Nëntorit u shndërrua në një dëshmi të qartë të bashkimit kulturor, të respektit reciprok dhe të vullnetit për ta ndërtuar të ardhmen me më shumë bashkëpunim e dinjitet kombëtar./Perspekiva/
