Me rastin e 1 Qershorit – Ditës Ndërkombëtare të Fëmijëve, në Shtëpinë e Kulturës në Bujanoc u organizua një program i veçantë festiv, i dedikuar fëmijëve, duke sjellë atmosferë të ngrohtë, argëtim, buzëqeshje dhe momente të paharrueshme për më të vegjlit.
Aktiviteti mblodhi një numër të madh fëmijësh, prindërish dhe qytetarësh, të cilët patën mundësinë të shijojnë programe artistike, lojëra dhe aktivitete të ndryshme që e bënë këtë ditë edhe më të veçantë. Gëzimi në fytyrat e fëmijëve dhe entuziazmi i tyre dëshmuan edhe një herë rëndësinë që ka kjo festë për ta.
Me këtë rast, kryetari i Komunës së Bujanocit, Arbër Pajaziti, përcolli urimet e tij për të gjithë fëmijët, duke u dëshiruar atyre një fëmijëri të lumtur, të mbushur me dashuri, shëndet, sukses dhe ëndrra të bukura.
“Fëmijët janë pasuria më e madhe që kemi dhe arsyeja pse duhet të punojmë çdo ditë për një të ardhme më të mirë. Investimi në mirëqenien, edukimin dhe zhvillimin e tyre është investim për të ardhmen e shoqërisë sonë”, theksoi kryetari Pajaziti në mesazhin e tij me rastin e kësaj dite.
Dita Ndërkombëtare e Fëmijëve shërben si një kujtesë për rëndësinë e mbrojtjes së të drejtave të fëmijëve, krijimin e kushteve më të mira për zhvillimin e tyre dhe ofrimin e mundësive që secili fëmijë të rritet i lumtur dhe i sigurt.
Në fund të aktivitetit, organizatorët uruan të gjithë fëmijët për festën e tyre, duke theksuar se ata janë drita, gëzimi dhe shpresa e së ardhmes sonë. Gëzuar 1 Qershorin të gjithë fëmijëve kudo që ndodhen!/Perspektiva/
