7 Marsi, Dita e Mësuesit, të premten e 7 marsit, në Shkollën e Mesme “Sezai Surroi” në Bujanoc, shënohet si një ngjarje me rëndësi kulturore dhe artistike në të gjitha trojet tona shqiptare. Kjo ditë u hap me himnin e flamurit, të performuar në piano nga nxënësja Viola Mehmeti.
Profesorët e gjuhës shqipe dhe dy psikologët e shkollës, në bashkëpunim me nxënësit, përgatitën një orë letrare duke shpalosur një program të begatshëm kulturor, ku u lexua dhe u recituan: historiku i 7 Marsit, me rastin e 138-vjetorit të hapjes së shkollës së parë shqipe në Korçë; recitali i gërshetuar nga poezitë për gjuhën dhe për shkollën shqipe nga poetë të ndryshëm shqiptarë; dhe recitimi i poezive nga nxënësit: Atika Ramadani, Eriola Bajrami, Erijon Sejdiji, Tuana Zairi, Era Memedaliu, Suela Ibrahimi dhe Ilmije Abdyli.
Përmbylljen e kësaj ngjarjeje të shënuar e zbukuruan nxënësit Erijon Sejdiu me kitare dhe Medina Haliti me këngën “Sonate”.
Gjithashtu, sot u bë hapja e muralit me porosinë “Lexo” në bibliotekën e shkollës sonë, të punuar nga nxënësit e klasës III-1, Enes Imeri dhe Leart Aliji.
Në fund, të gjithë mësuesve të të gjitha niveleve të arsimit të shkollës shqipe, kudo që punojnë, ua urojmë 7 Marsin – Ditën e Mësuesit, në përkujtim të hapjes së Shkollës së Parë Shqipe më 7 Mars 1887, ngase për të arritur deri te kjo ditë, janë dashur përpjekje dhe sakrifica të pandërprera ndër shekuj./Perspektiva/
